കുവൈത്ത് സിറ്റി: കുവൈത്തില് ബൂസ്റ്റര് ഡോസ് കോവിഡ് വാക്സിനേഷന് അടുത്തയാഴ്ച നല്കിത്തുടങ്ങും. ആദ്യ രണ്ട് ഡോസ് സ്വീകരിച്ച് ആറുമാസത്തിന് ശേഷമാണ് ബൂസ്റ്റര് ഡോസ് കോവിഡ് വാക്സിന് നല്കുകയെന്ന് ആരോഗ്യ മന്ത്രാലയ വക്താവ് ഡോ. അബ്ദുല്ല അല് സനദ് പറഞ്ഞു.
രോഗം പകരാന് ഏറ്റവും കൂടുതല് സാധ്യതയുള്ള മുന്നിര ആരോഗ്യപ്രവര്ത്തകര്, 60 വയസ്സ് കഴിഞ്ഞവര്, ശരീരത്തിന്റെ പ്രതിരോധശേഷി കുറക്കുന്ന രോഗങ്ങള് ഉള്ളവര് എന്നിവര്ക്കാണ് മുന്ഗണന നല്കി ആദ്യഘട്ടത്തില് ബൂസ്റ്റര് ഡോസ് നല്കുന്നത്.
ഇവര്ക്ക് പ്രത്യേക രജിസ്ട്രേഷന് ആവശ്യമില്ല. മുന്ഗണന വിഭാഗത്തില്പെട്ടവരെ ആരോഗ്യമന്ത്രാലയം തന്നെ കണ്ടെത്തി ഇവരുടെ മൊബൈലിലേക്ക് വാക്സിന് നല്കുന്ന തീയതിയും സമയവും സ്ഥലവും അറിയിച്ചുള്ള എസ്.എം.എസ് സന്ദേശം അയക്കുകയാണ് ചെയ്യുന്നത്. ആദ്യ ഡോസ് സ്വീകരിച്ചത് ഏത് വാക്സിന് ആണെങ്കിലും ബൂസ്റ്റര് ആയി ഫൈസര് ബയോണ്ടെക് നല്കാനാണ് തീരുമാനം.