മസ്കത്ത്: ആശങ്കയുടെ കാര്‍മേഘങ്ങള്‍ നീങ്ങി. ഷഹീന്‍ ചുഴലിക്കാറ്റിെന്‍റ ഭീതിയൊഴിഞ്ഞതോടെ നഗരജീവിതം സാധാരണനിലയിലായി. സര്‍ക്കാര്‍, സ്വകാര്യസ്ഥാപനങ്ങള്‍ക്ക് അവധിയായതിനാല്‍ നഗരത്തില്‍ വലിയ തിരക്ക് അനുഭവപ്പെട്ടില്ല. വാണിജ്യ-വ്യാപാര സ്ഥാപനങ്ങള്‍ ചെറിയതോതില്‍ തുറന്ന് പ്രവര്‍ത്തിച്ചു. ദിവസവേതനത്തിന് േജാലിചെയ്യുന്ന നിര്‍മാണ മേഖലയിലെ തൊഴിലാളികള്‍ തൊഴില്‍സ്ഥലത്തേക്ക് മടങ്ങിത്തുടങ്ങി. ഹൈപര്‍ മാര്‍ക്കറ്റ്, കോഫി ഷോപ്, ബാര്‍ബര്‍ ഷോപ് എന്നിവ രാവിലെ തന്നെ തുറന്നു. റോഡ് ഗതാഗതം സാധാരണഗതിയിലായി. റോഡുകളിലേക്ക് വീണ മരങ്ങളും മറ്റും അധികൃതര്‍ നീക്കി. പല വ്യാപാരസ്ഥാപനങ്ങളുടെയും മേല്‍ക്കൂരകള്‍ പറന്നുപോയി.
ശുചീകരണവും ഭക്ഷണ വിതരണവും നടത്തി
പല പ്രദേശങ്ങളിലും മലയാളികളടക്കമുള്ള കൂട്ടായ്മകളുടെ നേതൃത്വത്തില്‍ ശുചീകരണവും ഭക്ഷണവിതരണവും നടന്നു. പ്രവാസി വെല്‍ഫെയര്‍ വളന്‍റിയേഴ്‌സ് ഖദറ മേഖലയില്‍ ഭക്ഷണം വിതരണം ചെയ്തു. മസ്കത്തില്‍നിന്നുള്ള മൂന്ന് സംഘങ്ങളായാണ് തര്‍മത്ത് മേഖലയില്‍ ശുചീകരണം നടക്കുന്നത്. വരും ദിവസങ്ങളില്‍ വെള്ളം കയറിയവരുടെ വീടുകള്‍ വൃത്തിയാക്കാന്‍ പ്രവാസി വെല്‍ഫെയര്‍ വളന്‍റിയര്‍മാരുടെ സഹായം ലഭിക്കുമെന്നും മേഖല സെക്രട്ടറി അര്‍ഷാദ് വളാഞ്ചേരി അറിയിച്ചു. കഴിഞ്ഞ മൂന്ന് ദിവസമായി പ്രവര്‍ത്തിക്കുന്ന കേന്ദ്ര ഹെല്‍പ് ലൈന്‍ സംവിധാനം നിരവധി പ്രവാസികള്‍ക്ക് ഉപകാരപ്രദമായതായും ജനസേവന കമ്മിറ്റി കണ്‍വീനര്‍ സഫീര്‍ നരിക്കുനി അറിയിച്ചു. സേവന പ്രവര്‍ത്തങ്ങള്‍ക്ക് മുനീര്‍ മാസ്റ്റര്‍, ഷമീം, സാദിക്ക് നെല്ലിക്കുഴി, സഫ്‌വാന്‍, നസറുദ്ദീന്‍, നൂറുദ്ദീന്‍, ഷമീര്‍ കൊല്ലക്കാന്‍ എന്നിവര്‍ നേതൃത്വം നല്‍കി.
