ദുബായ് : വാടക നിരക്ക് ദുബായില്‍ കൂടിത്തുടങ്ങിയതോടെ ഷാര്‍ജയില്‍ നിന്നും മറ്റ് വടക്കന്‍ എമിറേറ്റുകളില്‍ നിന്നും ഇവിടേക്ക് താമസം മാറ്റുന്നവരുടെ എണ്ണം കുറയുന്നു.
കോവിഡിനെ തുടര്‍ന്ന് കഴിഞ്ഞ രണ്ടു വര്‍ഷം ദുബായില്‍ പല മേഖലകളിലും വാടക കുറഞ്ഞിരുന്നു.
കരാമയില്‍പോലും 80,000 ദിര്‍ഹം വാര്‍ഷിക വാടക നിരക്കായിരുന്നത് 70,000ത്തിലേക്കു കുറഞ്ഞിരുന്നു. ഈ പശ്ചാത്തലത്തില്‍ ഷാര്‍ജയില്‍ നിന്നും മറ്റും കൂടുതല്‍ കുടുംബങ്ങള്‍ ദുബായിലേക്ക് താമസം മാറ്റിയിരുന്നു. എന്നാല്‍, കഴിഞ്ഞ വര്‍ഷം അവസാനം മുതല്‍ വിപണി കൂടുതല്‍ സജീവമായതോടെ ദുബായില്‍ പലയിടത്തും വാടക നിരക്കും കൂടിയിട്ടുണ്ട്.
ഈ വര്‍ഷവും ഇതേ നിലയില്‍ വാടക കൂടുമെന്ന് മേഖലയിലുള്ളവരും ചൂണ്ടിക്കാട്ടുന്നു. ബിസിനസ് ബേ, ഗ്രീന്‍സ്, ദെയ്റ, ദുബായ് സ്പോര്‍ട്സ് സിറ്റി, പാം ജുമൈറ എന്നിവിടങ്ങളിലെ വാടക നിരക്ക് ഉയര്‍ന്നിട്ടുണ്ട്.ട 2012ലെ ഉയര്‍ന്ന നിലയിലേക്കു വാടക കൂടിക്കൊണ്ടിരിക്കുകയാണ്. അതേസമയം ദയ്റ, ഡിസ്കവറി ഗാര്‍ഡന്‍സ്, ഇന്റര്‍നാഷനല്‍ സിറ്റി എന്നിവിടങ്ങളില്‍ ഒരു മുറി അപാര്‍ട്മെന്റുകളുടെ വാടക കുറഞ്ഞിട്ടുമുണ്ടെന്ന് ഈ മേഖലയിലെ ആസ്റ്റെകോയുടെ കണക്കുകളും തെളിയിക്കുന്നു.
