കുവൈത്ത് സിറ്റി: ഭക്ഷ്യവസ്തുക്കളും നിത്യോപയോഗ സാധനങ്ങളും വിതരണം ചെയ്യുന്ന വാഹനങ്ങള്‍ക്കുള്ള പുതിയ നിയന്ത്രണങ്ങള്‍ അടുത്തമാസം മുതല്‍ പ്രാബല്യത്തില്‍ വരുമെന്ന് കുവൈത്ത് ആഭ്യന്തര മന്ത്രാലയം അറിയിച്ചു.
ഭക്ഷ്യവസ്തുക്കളും നിത്യോപയോഗ സാധനങ്ങളും ഡെലിവറി ചെയ്യുന്നവര്‍ നിബന്ധനകള്‍ പാലിക്കണം.
അടുത്ത മാസം മുതല്‍ പുതിയ നിബന്ധനകള്‍ പാലിക്കാത്ത സ്ഥാപനങ്ങളുടെ ലൈസന്‍സ് സസ്‌പെന്‍ഡ് ചെയ്ത് നിയമനടപടി സ്വീകരിക്കുമെന്നും വാഹനങ്ങളുമായി ബന്ധപ്പെട്ട ഗതാഗത വകുപ്പിന്റെ വ്യവസ്ഥകളും ചട്ടങ്ങളും പാലിക്കാന്‍ എല്ലാവരും ബാധ്യസ്ഥരാണെന്നും ആഭ്യന്തര മന്ത്രാലയം വ്യക്തമാക്കി. രാജ്യത്തെ നിരത്തുകളിലെ ഇരുചക്ര വാഹനങ്ങളുടെ ആധിക്യം നിയന്ത്രിക്കുന്നതിന് പൊതുമരാമത്ത് മന്ത്രാലയം, പബ്ലിക് അതോറിറ്റി ഫോര്‍ റോഡ് ആന്‍ഡ് ട്രാന്‍സ്പോര്‍ട്ട് എന്നിവയുമായി ചര്‍ച്ച ചെയ്ത് പദ്ധതികള്‍ നടപ്പാക്കുമെന്നും അധികൃതര്‍ കൂട്ടിച്ചേര്‍ത്തു.
പ്രധാന നിബന്ധനകള്‍ : –
ഡ്രൈവര്‍ക്ക് ആരോഗ്യ മന്ത്രാലയം നല്‍കിയ ആരോഗ്യ സര്‍ട്ടിഫിക്കറ്റ് ഉണ്ടായിരിക്കണം
തൊഴിലാളിയുടെ റസിഡന്‍സ് ഡെലിവറി കമ്ബനിയുടെ പേരില്‍തന്നെ ആയിരിക്കണം
സ്ഥാപനത്തിന്റെ സ്റ്റിക്കര്‍ വാഹനത്തില്‍ പതിക്കണം
കമ്ബനി യൂനിഫോം ധരിച്ചിരിക്കണം
