വ്യാജ സര്‍ട്ടിഫിക്കറ്റുകളുണ്ടാക്കി 10,000ദിര്‍ഹമിന് വിറ്റ മൂന്നംഗ സംഘത്തെ ദുബൈ പൊലീസ് പിടികൂടി. അന്തരാഷ്ട്ര തലത്തില്‍ ഉപയോഗികപ്പെടുന്ന ഇന്‍റര്‍നാഷണല്‍ ഇംഗ്ലീഷ് ലാംഗ്വേജ് ടെസ്റ്റിങ് സിസ്റ്റം(ഐ.ഇ.എല്‍.ടി.എസ്) സര്‍ട്ടിഫികറ്റുകളാണ് വ്യാജമായി ഉണ്ടാക്കിയതായി കണ്ടെത്തിയത്.
വിവിധ ജോലികള്‍ ചെയ്യുന്ന മൂന്നു പ്രതികളും ചേര്‍ന്നാണ് സര്‍ടിഫിക്കറ്റ് ഉണ്ടാക്കിയതെന്നും സാമൂഹിക മാധ്യമങ്ങള്‍ വഴിയാണ് ആവശ്യക്കാരെ കണ്ടെത്തിയതെന്നും അന്വേഷണത്തില്‍ തെളിഞ്ഞിട്ടുണ്ട്. വിവിധ ജോലികള്‍ക്കും വിദ്യഭ്യാസത്തിനും യൂറോപ്യന്‍ രാജ്യങ്ങളിലേക്ക് പോകാന്‍ ഉദ്ദേശിക്കുന്നവരാണ് ഇത്തരത്തില്‍ കബളിപ്പിക്കപ്പെട്ടത്. ആവശ്യക്കാരോട് 5000ദിര്‍ഹം അഡ്വാന്‍സായി വാങ്ങുകയും ഐ.ഇ.എല്‍.ടി.എസ് ഒറിജിനല്‍ പരീക്ഷക്ക് ഹാജരാകാന്‍ പറയുകയും ചെയ്യും. പരീക്ഷക്ക് രണ്ട് ദിവസത്തിന് ശേഷം വിജയിച്ചുവെന്നും ബാക്കി തുക നല്‍കിയാല്‍ സര്‍ടിഫിക്കറ്റ് നല്‍കുമെന്നും അറിയിക്കും.
