മസ്കത്ത്: ഒമാനില്‍ 2021 ഒക്ടോബറിലെ എണ്ണ വില അടുത്ത വര്‍ഷം അവസാനം വരെ നിലനിര്‍ത്താന്‍ നിര്‍ദ്ദേശം നല്‍കി ഒമാന്‍ സുല്‍ത്താന്‍ ഹൈതം ബിന്‍ താരിക്. വില വര്‍ധനവ് തടയാനും ഒമാന്‍ സുല്‍ത്താന്റെ അദ്ധ്യക്ഷതയില്‍ ചേര്‍ന്ന മന്ത്രിസഭാ യോഗം നിര്‍ദ്ദേശം നല്‍കി. ദേശീയദിനാഘോഷങ്ങളുടെ ഭാഗമായി സലാലയിലെ അല്‍ ഹുസ്ന്‍ കൊട്ടാരത്തിലാണ് മന്ത്രിസഭാ യോഗം ചേര്‍ന്നത്.
വിവിധ സര്‍ക്കാര്‍ സേവനങ്ങള്‍ക്കുള്ള ഫീസുകള്‍ കുറയ്ക്കാനും ചില ഫീസുകള്‍ ഒഴിവാക്കാനുമുള്ള തീരുമാനത്തിന് മന്ത്രിസഭ അംഗീകാരം നല്‍കിയിട്ടുണ്ട്. തൊഴില്‍ നഷ്ടപ്പെട്ട ഒമാനി ജീവനക്കാര്‍ക്ക് അടുത്ത വര്‍ഷം ജൂണ്‍വരെ തൊഴില്‍ സുരക്ഷ നല്‍കണമെന്നും ഒമാന്‍ സുല്‍ത്താന്‍ നിര്‍ദ്ദേശം നല്‍കി. 2012 ബാച്ചിലെ ഒമാന്‍ സര്‍ക്കാര്‍ ജീവനക്കാര്‍ക്ക് പ്രമോഷന്‍ നല്‍കണം. സിവില്‍ സര്‍വിസ് സ്‌കീമിലും മറ്റു വിഭാഗങ്ങളിലും ഉള്‍പ്പെട്ട പ്രമോഷനു യോഗ്യത ഉള്ളവര്‍ക്കാണ് ആനുകൂല്യം ലഭിക്കുക. അതേസമയം, 450 റിയാലില്‍ താഴെ മാസ വരുമാനമുള്ള സായുധ സേനയില്‍ നിന്നു വിരമിച്ചവരുടെ ഭവന വായ്പാ പദ്ധതികള്‍ ഒഴിവാക്കും.
