മസ്‌കത്ത്: ഒമാന്റെ വിവിധ ഭാഗങ്ങളില്‍ മഴയ്ക്ക് സാധ്യതയുണ്ടെന്ന് മുന്നറിയിപ്പ് നല്‍കി കാലാവസ്ഥാ നിരീക്ഷണ കേന്ദ്രം. ന്യൂനമര്‍ദ്ദത്തെ തുടര്‍ന്ന് വരും ദിവസങ്ങളില്‍ ഒമാന്റെ വിവിധ ഗവര്‍ണറേറ്റുകളില്‍ മഴയ്ക്ക് സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം. തിങ്കള്‍, ചൊവ്വ ദിവസങ്ങളില്‍ മുസന്ദം, തെക്കന്‍ ബാത്തിന, വടക്കന്‍ ബാത്തിന ഗവര്‍ണറേറ്റുകളിലും അല്‍ ഹജര്‍ പര്‍വത നിരകളിലുമാണ് മഴ ലഭിക്കുക.
ശക്തമായ കാറ്റിനും ഇടി മിന്നലിനും സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. അതേസമയം, തിങ്കളാഴ്ച്ച മുതല്‍ യുഎഇയുടെ വിവിധ ഭാഗങ്ങളിലും മഴയ്ക്ക് സാധ്യതയുണ്ട്. നവംബര്‍ 21 തിങ്കളാഴ്ച മുതല്‍ നവംബര്‍ 23, ബുധനാഴ്ച വരെ രാജ്യത്തെ കാലാവസ്ഥയില്‍ വ്യതിയാനം ഉണ്ടാകാനിടയുള്ളതായി കാലാവസ്ഥാ വിദഗ്ധര്‍ പ്രവചിക്കുന്നു.
തെക്കുകിഴക്കന്‍ ദിശയില്‍ നിന്നുള്ള ന്യൂനമര്‍ദ്ദത്തിനൊപ്പം, തെക്കുകിഴക്കന്‍ ദിശയില്‍ നിന്നും, വടക്കുകിഴക്കന്‍ ദിശയില്‍ നിന്നും ഈര്‍പ്പമുള്ള കാറ്റിനും സാധ്യതയുണ്ട്. യുഎഇയുടെ തീരപ്രദേശങ്ങളിലും, പടിഞ്ഞാറന്‍ പ്രദേശങ്ങളിലും ഈ കാലയളവില്‍ മഴ ലഭിക്കാനിടയുണ്ടെന്നും കാലാവസ്ഥാ വിദഗ്ധര്‍ വ്യക്തമാക്കി.
