മസ്കത്ത്: ഒമാനിലെ പൊതുസ്ഥലങ്ങളില്‍ അലക്ഷ്യമായി മാലിന്യം വലിച്ചെറിയുന്നവര്‍ക്ക് മസ്കറ്റ് മുനിസിപ്പാലിറ്റി വീണ്ടും മുന്നറിയിപ്പ് നല്‍കി. മസ്കറ്റിലെ അല്‍ ജബല്‍ ബൗഷര്‍ സ്ട്രീറ്റിന്‍റെ മുകളില്‍ നിന്ന് എടുത്ത ചില ചിത്രങ്ങള്‍ ഉള്‍പ്പെടെ തങ്ങളുടെ ഔദ്യോഗിക ട്വിറ്റര്‍ അക്കൗണ്ടില്‍ പോസ്റ്റ് ചെയ്താണ് മസ്കറ്റ് മുനിസിപ്പാലിറ്റി മുന്നറിയിപ്പ് നല്‍കിയത്.
പൊതുസ്ഥലങ്ങളില്‍ മാലിന്യം തള്ളുന്നത് പരിസ്ഥിതിയെ എങ്ങനെ പ്രതികൂലമായി ബാധിക്കുന്നു എന്നതിനെക്കുറിച്ച്‌ ബോധവത്കരിക്കുകയാണ് കാമ്ബയിന്‍റെ ലക്ഷ്യം. വിനോദ സഞ്ചാരികള്‍ക്കായി സജ്ജമാക്കിയ കേന്ദ്രങ്ങളില്‍ ശുചിത്വം പാലിക്കേണ്ടത് ഓരോരുത്തരുടെയും ഉത്തരവാദിത്തമാണ്. നിയമപരമായ ബാധ്യതകളില്‍ നിന്ന് രക്ഷപ്പെടാന്‍, ഓരോ യാത്രക്കാരനും അവരുടെ ഉത്തരവാദിത്തങ്ങള്‍ നിറവേറ്റുന്നുവെന്ന് ഉറപ്പാക്കണമെന്നും മുനിസിപ്പാലിറ്റി പുറത്തിറക്കിയ സന്ദേശത്തില്‍ പറയുന്നു. പൊതുസ്ഥലങ്ങളില്‍ മാലിന്യം വലിച്ചെറിയുന്നവര്‍ക്ക് 100 ഒമാനി റിയാല്‍ (21,000 ഇന്ത്യന്‍ രൂപയിലധികം) പിഴ ചുമത്തും.
