കുവൈത്തില് എണ്ണ ഉല്പാദനം വര്ധിപ്പിക്കുന്നു.ഇതോടെ പ്രതിദിന ഉല്പാദനം 1.05 ദശലക്ഷം ബാരലായി ഉയരും. റിഫൈനറി പൂര്ണ സജ്ജമാകുന്നതോടെ കുവൈത്തിന് പ്രതിദിനം 1.4 ദശലക്ഷം ബാരല് ഉല്പാദിപ്പിക്കാന് ശേഷിയുണ്ടാകുമെന്ന് പ്രാദേശിക മാധ്യമമായ അല് ഖബസ് റിപ്പോര്ട്ട് ചെയ്തു.
പ്രതിദിനം 6,15,000 ബാരല് ഉല്പാദനശേഷിയുള്ള അല് സൂര് എണ്ണ ശുദ്ധീകരണ പദ്ധതിയുടെ നിര്മാണം 2018 ലാണ് ആരംഭിച്ചത്. ഇന്ത്യന് കമ്ബനിയായ എസ്സാര് ഉള്പ്പെടുന്ന അന്താരാഷ്ട്ര കണ്സോര്ട്ട്യമാണ് നിര്മാണം നടത്തുന്നത്. അല് സൂര് റിഫൈനറി പൂര്ത്തിയാകുന്നതോടെ സൗദി അറേബ്യ കഴിഞ്ഞാല് മിഡിലീസ്റ്റ്, നോര്ത്ത് ആഫ്രിക്ക മേഖലയിലെ ശുദ്ധീകരണ ശേഷിയുള്ള രണ്ടാമത്തെ വലിയ രാജ്യമായി കുവൈത്ത് മാറും.
ഫിച്ച് സൊല്യൂഷന്സ് റിപ്പോര്ട്ട് അനുസരിച്ച് 2024 ഓടെ കുവൈത്തിന്റെ ഇന്ധന കയറ്റുമതി മൂന്ന് മടങ്ങിലധികം വര്ധിക്കും. അതേസമയം, റഷ്യയുടെ എണ്ണ ഇറക്കുമതിക്ക് യൂറോപ്യന് ഉപരോധം ഏര്പ്പെടുത്തിയ സാഹചര്യത്തില് യൂറോപ്പിലേക്കുള്ള ഇന്ധന കയറ്റുമതി വര്ധിപ്പിക്കാന് കുവൈത്ത് ഒരുങ്ങുന്നതായും റിപ്പോര്ട്ടുകളുണ്ട്.