കുവൈത്ത്: പ്രവാസി ജീവനക്കാരെ പിരിച്ച്‌ വിടാനൊരുങ്ങി വിദ്യാഭ്യാസ മന്ത്രാലയം. അധ്യയന വര്‍ഷത്തിന്റെ അവസാനത്തോടെ ആയിരത്തിലധികം അധ്യാപകരെ പിരിച്ചുവിടുമെന്നാണ് സൂചനകള്‍.
നിലവിലെ അധ്യയന വര്‍ഷം പൂര്‍ത്തിയാകുന്ന മുറക്ക് അധ്യാപകരെ ഒഴിവാക്കണമെന്നും അതിനുള്ള നടപടികള്‍ ഉടന്‍ ആരംഭിക്കണമെന്നും മന്ത്രാലയം വിദ്യാഭ്യാസ സഥാപനങ്ങള്‍ക്ക് നിര്‍ദ്ദേശം നല്‍കിയതായി പ്രാദേശിക മാധ്യമമായ കുവൈത്ത് ടൈംസ് റിപ്പോര്‍ട്ടുചെയ്തു.
ഓരോ വിഷയങ്ങളിലും കുവൈത്തി പൗരന്മാരുടെ സേവനം ലഭിക്കുന്നതിന്റെ അടിസ്ഥാനത്തിലാണ് പ്രവാസി അധ്യാപകരുടെ സര്‍വീസ് അവസാനിപ്പിക്കുക. മന്ത്രാലയത്തിലെ വിവിധ വകുപ്പുകളില്‍, ഭരണപരമായ നടപടി ക്രമങ്ങള്‍ പൂര്‍ത്തീകരിച്ച്‌ സ്വദേശികള്‍ക്ക് നിയമനം നല്‍കും.
കുവൈത്ത് യൂനിവേഴ്സിറ്റിയില്‍ നിന്നും പബ്ലിക് അതോറിറ്റി ഫോര്‍ അപ്ലൈഡ് എഡ്യൂക്കേഷന്‍ ആന്റ് ട്രെയിനിംങ് കോളേജില്‍ നിന്നും ബിരുദം നേടിയ സ്വദേശികള്‍ക്ക് കൂടുതല്‍ അവസരങ്ങള്‍ ഒരുക്കുന്നതിന്‍റെ ഭാഗമായാണ് പുതിയ നീക്കം. സിവില്‍ സര്‍വീസ് കമ്മീഷനുമായി സഹകരിച്ചായിരിക്കും നിയമനങ്ങള്‍ നടപ്പിലാക്കുക.
