കുവൈറ്റില്‍ ജോലി ചെയ്യുന്ന ഫിലിപ്പീന്‍സില്‍ നിന്നുള്ള ഗാര്‍ഹിക തൊഴിലാളികള്‍ കൂട്ടമായി നാട്ടിലേക്ക് തിരിക്കുന്നു.
രാജ്യത്ത് തൊഴില്‍ സുരക്ഷയുമായി ബന്ധപ്പെട്ട ആശങ്കകള്‍ നിലനില്‍ക്കുന്ന സാഹചര്യത്തിലാണ് ഫിലിപ്പിനോ ഗാര്‍ഹിക ജീവനക്കാര്‍ വലിയ തോതില്‍ കുവൈറ്റ് വിടുന്നത്. രാജ്യത്ത് ഗാര്‍ഹിക തൊഴിലാളികള്‍ ഒളിച്ചോടിയതുമായി ബന്ധപ്പെട്ട നിരവധി കേസുകള്‍ റിപ്പോര്‍ട്ട് ചെയ്യപ്പെടുന്നതായി മാധ്യമങ്ങള്‍ അറിയിച്ചു. അതേപോലെ ഫിലിപ്പീന്‍സ് എംബസിയില്‍ അഭയം തേടുന്നവരുടെ എണ്ണവും നാള്‍ക്കുനാള്‍ വര്‍ധിച്ചുവരികയാണ്.
ഫിലിപ്പീന്‍സ് എംബസിയില്‍ പ്രതിദിനം ഇരുപതിലേറെ വനിതാ ഗാര്‍ഹിക തൊഴിലാളികള്‍ അഭയം തേടി എത്തുന്നതായി എംബസി വൃത്തങ്ങള്‍ ദിനപത്രത്തോട് പറഞ്ഞു. ഈ തൊഴിലാളികളില്‍ ഭൂരിഭാഗവും ഒളിച്ചോടിയതായി രജിസ്റ്റര്‍ ചെയ്തിട്ടുള്ളവരാണ്. തൊഴിലുടമകളില്‍ നിന്നുള്ള പീഡനനങ്ങളും മോശമായ പെരുമാറ്റങ്ങളും തൊഴിലിടങ്ങളിലെ അരക്ഷിതാവസ്ഥയും കാരണം എംബസിയില്‍ അഭയം തേടി എത്തുന്നവരുടെ എണ്ണം ദിനംപ്രതി വര്‍ധിച്ചുവരുന്ന സാഹചര്യത്തില്‍ അവരെ താമസിപ്പിക്കുന്നതിനായി എംബസി ഹവല്ലിയിലെ ഇബ്‌നു ഖല്‍ദൂണ്‍ സ്ട്രീറ്റില്‍ പുതിയ താമസസൗകര്യം കണ്ടെത്തിയിട്ടുണ്ടെന്നും അധികൃതര്‍ അറിയിച്ചു.
