ഒമാന്‍-കേരള സെക്ടറുകളില്‍ കുറഞ്ഞ നിരക്കില്‍ ടിക്കറ്റുമായി വിമാന കമ്ബനികള്‍. മുന്‍വര്‍ഷങ്ങളെ അപേക്ഷിച്ച്‌ പകുതി നിരക്കില്‍ ടിക്കറ്റ് ലഭിക്കുന്നതിന്റെ സന്തോഷത്തിലാണ് പ്രവാസി മലയാളികള്‍. പെരുന്നാളിന് തൊട്ടുമുമ്ബുള്ള ദിവസങ്ങളില്‍ വരെ 50 റിയാലില്‍ താഴെ മാത്രമാണ് ടിക്കറ്റ് നിരക്ക്.
ഒമാന്‍-കേരള സെക്ടറുകളിലേക്ക് മുന്‍ വര്‍ഷങ്ങളില്‍ മൂന്ന് ഇരട്ടിവരെ ടിക്കറ്റ് നിരക്കുയര്‍ന്നിരുന്ന റമദാനിലെ അവസാന ദിനങ്ങളിലും ഇത്തവണ താരതമ്യേന കുറഞ്ഞ ചെലവില്‍ ടിക്കറ്റുകള്‍ ലഭ്യമാണ്. മസ്‌കത്തില്‍ നിന്ന് കോഴിക്കോട്ടേക്കാണ് വിമാന ടിക്കറ്റ് നിരക്ക് കുറവുള്ളത്.ടിക്കറ്റ് നിരക്ക് കൂടുതല്‍ തിരുവനന്തപുരത്തേക്കുമാണ്. സലാലയില്‍ നിന്നുള്ള നിരക്കുകളിലും വലിയ വര്‍ധന ഇത്തവണയില്ല.
എയര്‍ ഇന്ത്യ എക്സ്പ്രസില്‍ മസ്‌കത്തില്‍ നിന്നും കോഴിക്കോട്ടേക്ക് ഏപ്രില്‍ 18 വരെ 37 റിയാലിന് ടിക്കറ്റുകള്‍ ലഭ്യമാണ്. മസ്‌കത്ത്-കണ്ണൂര്‍ റൂട്ടില്‍ ഏപ്രില്‍ 17ന് 35 റിയാലാണ് ടിക്കറ്റിന് ചെലവ് വരുന്നത്. തിരുവനന്തപുരം സെക്ടറില്‍ ഏപ്രില്‍ 18 വരെ 42 റിയാലില്‍ താഴെയാണ് നിരക്ക്.അതേസമയം, ടിക്കറ്റ് നിരക്ക് കുറവാണെങ്കിലും മുന്‍കാലങ്ങളെ അപേക്ഷിച്ച്‌ ഇത്തവണ പെരുന്നാളിന് നാട്ടിലേക്ക് ടിക്കറ്റെടുത്തവര്‍ കുറവാണെന്ന് ട്രാവല്‍ ഏജന്‍സികള്‍ പറയുന്നു. എന്നാല്‍, ഒമാനില്‍ പെരുന്നാള്‍ അവധി പ്രഖ്യാപിച്ചത് ടിക്കറ്റ് നിരക്കുയര്‍ന്നേക്കുമെന്നും ട്രാവല്‍ ഏജന്‍സികള്‍ പറയുന്നു.
