ലണ്ടന്: രാജ്യത്തു ഉയരുന്ന പലിശ നിരക്കുകള്ക്കെതിരെ പിടിച്ചുനില്ക്കാന് പാടുപെടുന്നതിനിടെ കഴിഞ്ഞ വര്ഷം അവസാനത്തോടെ വീടുകള് ഏഴ് ബില്ല്യണ് പൗണ്ടോളം തങ്ങളുടെ മോര്ട്ട്ഗേജുകളില് അധികമായി തിരിച്ചടച്ചതായി റിപ്പോര്ട്ട്. 2022-ല് മുന്പെങ്ങുമില്ലാത്ത വിധത്തില് ഭവന ഉടമകള് 23.3 ബില്ല്യണ് പൗണ്ടാണ് മോര്ട്ട്ഗേജ് ഓവര്-പേയ്മെന്റുകള് അടയ്ക്കാനായി വിനിയോഗിച്ചത്. കഴിഞ്ഞ മൂന്ന് മാസത്തിനിടെ 6.7 ബില്ല്യണ് പൗണ്ടെന്ന റെക്കോര്ഡ് തിരിച്ചടവും ഈയിനത്തില് ഉണ്ടായി. 1999-ല് റെക്കോര്ഡുകള് രേഖപ്പെടുത്താന് ആരംഭിച്ചത് മുതല് ആദ്യമായാണ് ക്വാര്ട്ടേര്ലി ഓവര്-പേയ്മെന്റുകള് ആറ് ബില്ല്യണ് പൗണ്ട് കടക്കുന്നത്.സാധാരണയായി ഭവനഉടമകള്ക്ക് മോര്ട്ട്ഗേജില് 10 ശതമാനം വരെ ഫീസ് ഈടാക്കാതെ അധികമായി അടയ്ക്കാന് കഴിയും. എന്നാല് ചില ബാങ്കുകള് ഈ പരിധി അടുത്ത ആഴ്ചകളിലായി വര്ദ്ധിപ്പിച്ചിട്ടുണ്ട്.
കഴിഞ്ഞ മാസം നാറ്റ്വെസ്റ്റ് 20 ശതമാനം വരെ ഫീസില്ലാതെ അധികം അടയ്ക്കാന് അവസരം ഒരുക്കിയിരുന്നു.ഒക്ടോബര്, നവംബര് മാസങ്ങളിലായി മോര്ട്ട്ഗേജ് നിരക്കുകള് കുതിച്ചുയര്ന്നതിന്റെ പ്രതിഫലനമാണ് ഈ ഓവര് പേയ്മെന്റ് തരംഗം. ഒക്ടോബറില് രണ്ട് വര്ഷത്തെ ശരാശരി ഫിക്സഡ് ഡീലുകളുടെ നിരക്ക് 14 വര്ഷത്തെ ഉയര്ന്ന തോതായ 6.65 ശതമാനത്തിലേക്ക് എത്തിയിരുന്നു. അഞ്ച് വര്ഷത്തെ ഡീലുകള് 6.51 ശതമാനത്തിലുമെത്തി.ഇതിന് ശേഷം നിരക്കുകള് താഴ്ന്നെങ്കിലും മഹാമാരിക്ക് മുന്പത്തേക്കാള് നിരക്ക് ഇപ്പോഴും അധികമാണ്. ഈ വര്ഷം 1.8 മില്ല്യണ് ഭവനഉടമകളുടെ ഫിക്സഡ് റേറ്റ് മോര്ട്ട്ഗേജുകള്ക്ക് അവസാനമാകുമെന്നാണ് യുകെ ഫിനാന്സ് കണക്ക്.