മസ്കത്ത്: ഈദുല്‍ ഫിത്ര്‍ വേളയില്‍ ട്രാഫിക് നിയമങ്ങളും ചട്ടങ്ങളും പാലിക്കാന്‍ എല്ലാവരും തയ്യാറാകണമെന്ന് റോയല്‍ ഒമാന്‍ പൊലീസ് ആവശ്യപ്പെട്ടു. പടക്കം പൊട്ടിക്കുമ്ബോഴോ മലകയറ്റം നടത്തുമ്ബോഴോ നീന്തുമ്ബോഴോ ഉണ്ടാകുന്ന അപകടങ്ങളില്‍നിന്ന് കുട്ടികളെ സംരക്ഷിക്കണം. വാഹനമോടിക്കുന്നവര്‍ ട്രാഫിക്ക് നിയമങ്ങളും വേഗ പരിധിയും പാലിക്കണം. വാഹനങ്ങള്‍ അശ്രദ്ധമായി ഓടിക്കുക, അല്ലെങ്കില്‍ ഡ്രിഫ്റ്റ് ചെയ്ത് പൊതു സൗകര്യത്തിന് തടസ്സം സൃഷ്ടിക്കുക എന്നിവയില്‍നിന്ന് വിട്ട് നില്‍ക്കണമെന്നും റോയല്‍ ഒമാന്‍ ഓണ്‍ലൈനില്‍ ഇറക്കിയ പ്രസ്താവനയില്‍ പറഞ്ഞു.
ഈദ് വേളയില്‍ പടക്കം പൊട്ടിക്കല്‍, റോഡ് മുറിച്ച്‌ കടക്കല്‍, നീന്തല്‍ തുടങ്ങി അപകടങ്ങള്‍ ഉണ്ടാകാന്‍ സാധ്യതയുള്ള വേളയില്‍ കുട്ടികളെ നോക്കാന്‍ രക്ഷിതാക്കള്‍ ശ്രദ്ധിക്കണം. എല്ലാവര്‍ക്കും സുരക്ഷ ഒരുക്കുന്നതിനും ഒമാനിലുടനീളം ഗതാഗതം സുഗമമാക്കുന്നതിനും ലക്ഷ്യമിട്ടുള്ള നടപടികള്‍ കൈക്കൊണ്ടിട്ടുണ്ടെന്നും റോയല്‍ ഒമാന്‍ പൊലീസ് അധികൃതര്‍ പ്രസതാവനയില്‍ പറഞ്ഞു.
