മസ്കത്ത്: വെള്ളിയാഴ്ച സീബ് റാമി റിസോര്‍ട്ടില്‍ നടക്കുന്ന മലയാളം ഒമാന്‍ ചാപ്റ്റര്‍ ‘മലയാള മഹോത്സവം 2023’ന്‍റെ ഒരുക്കങ്ങള്‍ പൂര്‍ത്തിയായതായി സംഘാടകര്‍ അറിയിച്ചു.
രാവിലെ 10 മുതല്‍ കുട്ടികളും മുഖ്യാതിഥിയായ നടനും സാഹിത്യകാരനുമായ ഇബ്രാഹിംകുട്ടി, കവിയും പ്രഫസറുമായ ശ്യാം സുധാകര്‍, മലയാളം ഒമാന്‍ ചാപ്റ്റര്‍ സ്ഥാപക ചെയര്‍മാനും അയര്‍ലന്‍ഡ് പീസ് കമീഷണറുമായ ഡോ. ജോര്‍ജ് ലെസ്‍ലി തുടങ്ങിയവരുമായുള്ള മുഖാമുഖത്തിലൂടെ പരിപാടികള്‍ക്ക് തുടക്കമാകും. മലയാളം മിഷന്‍ മുന്‍ രാജ്യാന്തര പരിശീലകനും അധ്യാപകനുമായ ബിനു കെ. സാം കുട്ടികള്‍ക്കും കുടുംബങ്ങള്‍ക്കുമായി വിനോദവും വിജ്ഞാനവും കോര്‍ത്തിണക്കി ‘നില്ല് നില്ല് സുല്ല് സുല്ല്’ പരിപാടി അവതരിപ്പിക്കും.
വൈകീട്ട് അഞ്ചിന് ചേരുന്ന സാംസ്കാരിക സമ്മേളനത്തില്‍ പ്രാവാസികള്‍ എഴുതിയ കവിതകളും കഥകളും ഉള്‍പ്പെടുത്തിയ ‘മണമുള്ള മണലെഴുത്ത്’ പുസ്തകം പ്രകാശനം ചെയ്യും. ബഹുമുഖ ഭാഷാധ്യാപകര്‍ക്കായി ഏര്‍പ്പെടുത്തിയ പ്രഥമ ഗുരുദക്ഷിണ പുരസ്കാരം രാജ്യാന്തര പരിശീലകനും സാമൂഹികപ്രവര്‍ത്തകനും േവ്ലാഗറും എഴുത്തുകാരനുമായ ബിനു കെ. സാമിന് സമ്മാനിക്കും.
മസ്കത്ത് കവിതക്കൂട്ടം അവതരിപ്പിക്കുന്ന ‘കവനക്കൊയ്ത്ത്’ ദൃശ്യാവിഷ്കാരവും പൂര്‍ണമായും മുളയില്‍ നിര്‍മിച്ച സംഗീത ഉപകരണങ്ങള്‍ ഉപയോഗിച്ച്‌ വയലി ആറങ്ങോട്ടുകര അവതരിപ്പിക്കുന്ന സംഗീത പരിപാടിയും അരങ്ങേറും.
