മസ്ക്കറ്റ്: ഒമാനില്‍ അനധികൃത തൊഴിലാളികളെ കണ്ടെത്താനുള്ള പരിശോധന കര്‍ശനമാക്കി തൊഴില്‍ മന്ത്രാലയം.
മസ്കത്ത് ഉള്‍പ്പെടെയുള്ള വിവിധ ഗവര്‍ണറേറ്റുകളില്‍ ജനുവരി ഒന്ന് മുതല്‍ തൊഴില്‍ മന്ത്രാലയത്തിൻ്റെ പരിശോധനകള്‍ കര്‍ശനമായി നടന്നുവരികയാണ്.
തെക്കൻ ബാത്തിന ഗവര്‍ണറേറ്റിലെ ബര്‍കയില്‍ നിന്ന് നിയമം ലംഘിച്ച 66 തൊഴിലാളികളെയാണ് പിടികൂടിയത്.
ഡയറക്‌ടറേറ്റ് ജനറല്‍ ഓഫ് ലേബര്‍ വെല്‍ഫെയറുമായി സഹകരിച്ചാണ് തൊഴില്‍ മന്ത്രാലയം പരിശോധനകള്‍ നടത്തുന്നത്. പ്രവാസികള്‍ തിങ്ങിപ്പാര്‍ക്കുന്ന മസ്കത്ത്, ദോഫാര്‍, വടക്ക് തെക്ക് ബാത്തിന എന്നീ നാല് ഗവര്‍ണറേറ്റുകളിലെ വിവിധ പ്രദേശങ്ങളിലാണ് ആദ്യ ഘട്ടത്തില്‍ പരിശോധന നടത്തുന്നത്.
നിയമവിരുദ്ധ തൊഴിലാളികളെ ഒഴിവാക്കി തൊഴില്‍ മേഖലയെ നിയന്ത്രിക്കുന്നതിന്റെ ഭാഗമായാണ് പരിശോധന.
