കുവൈത്ത് സിറ്റി: കേരള ആര്ട് ലവേഴ്സ് അസോസിയേഷൻ കല കുവൈത്ത് കഴിഞ്ഞ 32 വര്ഷമായി നടത്തി വരുന്ന സൗജന്യ മാതൃഭാഷ പഠന പദ്ധതിയുടെ അവധിക്കാല മലയാളം ക്ലാസുകള് ജൂണ് ആദ്യ ആഴ്ച ആരംഭിക്കുമെന്ന് ഭാരവാഹികള് അറിയിച്ചു.
1 മുതല് 12 വരെയുള്ള ക്ലാസുകളിലെ കുട്ടികള്ക്ക് മലയാളം ക്ലാസുകളില് പഠിക്കുന്നതിനായി രജിസ്റ്റര് ചെയ്യാവുന്നതാണ്.
കഴിഞ്ഞ 5 വര്ഷമായി കേരള സര്ക്കാരിനു കീഴിലുള്ള മലയാളം മിഷനുമായി ചേര്ന്നാണ് കലയുടെ മാതൃഭാഷാ പഠന പ്രവര്ത്തനങ്ങള് മുന്നോട്ടു പോകുന്നത്. ‘എവിടെയെല്ലാം മലയാളി, അവിടെയെല്ലാം മലയാളം’ എന്ന ലക്ഷ്യത്തോടെ കേരള സര്ക്കാരിന്റെ സാംസ്കാരിക വകുപ്പിന് കീഴിലുള്ള മലയാളം മിഷൻ സിലബസ്സിനെ അടിസ്ഥാനമാക്കിയാണ് കല കുവൈറ്റിന്റെ മലയാളം ക്ലാസുകള് സംഘടിപ്പിക്കുന്നത്.
കഴിഞ്ഞ 5 വര്ഷമായി സര്ട്ടിഫിക്കറ്റ് / ഡിപ്ലോമ കോഴ്സുകള്ക്ക് വേണ്ടി കണിക്കൊന്ന, സൂര്യകാന്തി, ആമ്ബല്, നീലകുറിഞ്ഞി എന്നീ നാല് കോഴ്സുകളിലാണ് അവധിക്കാല ക്ലാസുകള് നടക്കുക. ഇതിനായി മലയാളം മിഷന്റെ സഹകരണത്തോടെ അധ്യാപകര്ക്ക് പ്രത്യേക പരിശീലനം നല്കിയിട്ടുണ്ട്. കലയുടെ മലയാളം ക്ലാസുകളില് പഠിച്ചുകൊണ്ടിരിക്കുന്ന വിദ്യാര്ഥികളും പുതുതായി പഠിക്കാനുള്ള വിദ്യാര്ഥികളും എത്രയും വേഗം രജിസ്ട്രേഷൻ പൂര്ത്തീകരിക്കണമെന്നും ഈ അവസരം പരമാവധി പ്രയോജനപ്പെടുത്തണമെന്നും മാതൃഭാഷ സമിതിയും കല കുവൈറ്റും അറിയിച്ചു.
രജിസ്റ്റര് ചെയ്യാനുള്ള ലിങ്ക് : https://forms.gle/9AGVHh9P5EvZsRpW6