മസ്ക്കറ്റ്: മലയാളം മിഷൻ ഒമാൻ സുഗതാഞ്ജലി ചാപ്റ്റര് തല ഫൈനല് മത്സരങ്ങള് നടത്തി. മേഖലാ മത്സരങ്ങളില് സബ് ജൂനിയര്, ജൂനിയര്, സീനിയര് വിഭാഗങ്ങളില് മത്സരിച്ചു വിജയിച്ച മുപ്പതോളം കുട്ടികളാണ് ഫൈനല് മത്സരത്തില് പങ്കെടുത്തത്.
റൂവി എംബിഡിയിലുള്ള കേരളാവിംഗ് ഹാളില് വച്ച് രാവിലെ പത്തുമണിക്കാണ് മത്സരങ്ങള് ആരംഭിച്ചത്. എഴുത്തുകാരി ഡോ. കെ പി സുധീര മത്സര വിജയികള്ക്ക് സമ്മാനങ്ങളും സര്ട്ടിഫിക്കറ്റുകളും നല്കി. കെ പി സുധീരയുടെ യാത്രാവിവരണം ‘ഭൂഖണ്ഡങ്ങളിലൂടെ’ എന്ന പുസ്തകത്തിന്റെ ഒമാനിലെ പ്രകാശനവും വേദിയില് നടന്നു. ചാപ്റ്റര് തല മത്സരത്തില് ആദ്യ മൂന്നു സ്ഥാനങ്ങള് നേടിയ കുട്ടികളെ നാട്ടില് വച്ചു നടക്കുന്ന മെഗാ ഫൈനല് മത്സരത്തില് പങ്കെടുപ്പിക്കും.
മലയാളം മിഷൻ ഒമാൻ ചാപ്റ്റര് പ്രസിഡന്റ് കെ സുനില്കുമാര് അധ്യക്ഷനായ സമാപന യോഗത്തില് സെക്രട്ടറി അനുചന്ദ്രൻ സ്വാഗതം പറഞ്ഞു. ചെയര്മാൻ ഡോ. ജെ രത്നകുമാര്, ട്രഷറര് ശ്രീകുമാര്, ഇന്ത്യൻ സ്കൂള് ഡയറക്ടര് ബോര്ഡ് മുൻ വൈസ് ചെയര്മാൻ സി എം നജീബ് എന്നിവര് ആശംസകള് നേര്ന്നു.