നിര്ണായക സംഭവവികാസത്തില്, സ്വകാര്യ മേഖലയിലെ ജീവനക്കാര്ക്ക് അവരുടെ സ്പോണ്സര്മാരുടെ അല്ലാത്തവരുടെ സ്ഥാപനങ്ങളില് ജോലി ചെയ്യാൻ കുവൈറ്റ് അനുമതി നല്കി.
2024 പുതുവര്ഷം മുതല് പ്രാബല്യത്തില് വരുന്ന പുതിയ തീരുമാനത്തിലൂടെ എല്ലാ സ്വകാര്യ മേഖലയിലെ ജീവനക്കാര്ക്കും പാര്ട്ട് ടൈം ജോലിയും വീട്ടിലിരുന്നുള്ള ജോലിയും (Work From Home) നിയമവിധേയമാക്കുന്നു.
സ്വന്തം തൊഴിലുടമയുടെ അംഗീകാരത്തിന് വിധേയമായി ഒരു മൂന്നാം കക്ഷിയുമായി പാര്ട്ട് ടൈം ജോലിക്ക് അനുമതി നല്കി ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് തലാല് ഖാലിദ് അല് അഹമ്മദ് അല് ജാബര് അല് സബാഹ് ഉത്തരവ് പുറപ്പെടുവിച്ചതായി കുവൈറ്റ് മാൻപവര് അതോറിറ്റി റിപ്പോര്ട്ട് ചെയ്തു.
പബ്ലിക് അതോറിറ്റി ഫോര് മാൻപവറില് നിന്ന് പാര്ട്ട് ടൈം വര്ക്ക് പെര്മിറ്റ് ലഭിക്കുകയാണെങ്കില്, ജീവനക്കാര്ക്ക് മറ്റൊരു തൊഴിലുടമയ്ക്കായി ഒരു ദിവസം പരമാവധി നാല് മണിക്കൂര് പാര്ട്ട് ടൈം ജോലി ചെയ്യാം. ഉയര്ന്ന ഡിമാൻഡ് കാരണം കരാര് മേഖലയെ പ്രതിദിന മണിക്കൂര് പരിധിയില് നിന്ന് ഒഴിവാക്കിയിട്ടുണ്ട്.
പുതിയ റിക്രൂട്ട്മെന്റിന് ബദലായി കുവൈറ്റില് നിലവിലുള്ള തൊഴിലാളികളെ ഉപയോഗപ്പെടുത്താനും ജനസംഖ്യാപരമായ അസന്തുലിതാവസ്ഥ പരിഹരിക്കാനും നിലവിലെ തൊഴില് വിപണി ആവശ്യങ്ങള് നിറവേറ്റാനുമാണ് പുതിയ തീരുമാനത്തിലൂടെ ലക്ഷ്യമിടുന്നതെന്ന് റിപ്പോര്ട്ടുകള് പറയുന്നു.